Cin News

त्रिभुवन राजपथ अन्तर्गत जीतपुरसिमरा ९ छातापिपराबाट झण्डै ३ किलोमिटर भित्रको एउटा विपन्न बस्ती । जहाँका नागरिक आफू बसेकै जमिनमा पनि आफ्नो अधिकार छैन । ग्रामीण सडक पेटीमा स-साना झुप्रा बनाएर घाम पानिको ओत लागिरहेका करिब ४० परिवारको यो गाउँ अहिले राज्यको नजरमा ‘करोडौँ कर छलेर फरार अभियुक्तहरूको बस्ती’ बनेको छ । गाउँमै दैनिक ज्यालादारीमा गुजारा चलाउँदै आएका त्यही बस्तीका महन्थ महरा चमार, राम्रो रोजगारी पाउने आसमा चार वर्ष पहिले राजधानी काठमाण्डौँ पस्नुभयो । उहाँलाई गतिलो पारिश्रमिक दिने र काम लगाइदिने लोभमा अजय नाम गरेका एक व्यक्तिले काठमाण्डौँ पुर्‍याएका थिए, जसको पूरै ठेगाना महन्थ आफैँलाई थाहा छैन । ‘दिनको ६ सय रुपैयाँले कसरी परिवार पाल्ने भन्ने चिन्ताले खाइरहेका बेला रामो काम दिने भनेर ठूलै मान्छे आएको थियो ।’ उहाँ भन्नुहुन्छ, ‘काम चाहिएको थियो, अरु केही सोधिएन ।’ ‘सबै त काठमाण्डौँ कमाउन जाने भन्छन्, त्यहाँ त सबैलाई काम मिलिहाल्छ भन्ने लाग्यो तर..।’ महन्थले थप्नुभयो ।