Sa Gemeente Londen Preke - Audio & Video

Die opdrag wat God vir ons elkeen gee hier op aarde is GROOT...maar God is GROTER!

Na afloop van ons uiters geseënde Re:vive London campaign saam met Angus Buchan, luister ons na 'n paar getuienisse oor die campaign. Rian help ons ook verstaan hoe om die vlammetjie wat nou aangesteek is aan die brand te hou.

In die lig van vandag se nagmaal wat ons gebruik, praat Rian oor die noodsaaklikheid om die Brood van die Lewe op 'n daaglikse basis in te neem. Net soos die Israeliete elke dag in die woestyn hul kwota manna moes gaan optel, net so moet ons (wanneer ons ook 'n woestyntydperk beleef), elke dag die Woord bestudeer om nie honger te word nie.

Gasprediker Tinus van Zyl lewer vandag 'n kragtige boodskap oor die gelykenis van die saaier - Ons as christene se werk is nie om onkruid uit te trek nie. Dit is ook nie om te oes nie, maar ons moet saai. Ons moet ons pikke en skoffels neersit en dit verruil vir 'n saadsak.

Verstaan jy God se vaderlike liefde vir ons? Sukkel jy om daardie aspek van God te verstaan? Rian gebruik die verhaal van die verlore seun om hierdie aspek van God meer duidelik te maak vir ons.

Na 'n baie intensiewe en suksesvolle kerkraad brainstorm naweek waar daar net weer na gekyk was na wat ons as SA Gemeente dryf en wat ons doel is, gesels Rian vandag met ons oor wat ons persoonlik dryf. Wat hou ons aan die gang? Is dit in lyn met God se woord en hoe verskuif ons die fokus op dit wat belangrik is.

Die laaste in ons preekreeks. Rian gesels vandag oor Jesus se vraag aan Petrus nadat Petrus hom 3 maal verloën het - Het jy my lief?

Rian kom skud ons boksies bietjie vandag deur ons te challenge om nie te vinnig die eerste klippe op te tel om mense te veroordeel nie. As Jesus nie 'n prostituut veroordeel het nie, wie is ons om enige iemand anders te veroordeel. Maak nie saak hoe goed of sleg hulle in ons oë is nie.

Preek twee in ons reeks Who wants to be a millionaire? Rian vra die vraag Wil jy gesond word? - die vraag wat Jesus vir die verlamde man gevra het by die bad van Bethesda.

Rian skop ons nuwe preekreeks af met die vraag "Wat Soek julle?" - Die vraag wat Jesus aan die begin van Sy aardse bediening aan Sy volgelinge gevra het.

Mens is so baie keer geneig om te konsentreer op jou eie persoonlike lewe en verhouding met God dat jy Sy algehele prentjie vir die mensdom op Aarde heeltemal vergeet of miskyk. Christo herhinner ons vandag om ons eie lewens binne daardie perspektief te sien.

Jesus daag sy dissipels uit om brood te kry vir ’n honger skare. “Gee julle vir hulle brood...” Hy gee die verantwoordelikheid vir die probleem weg. Honger mense in die moeilikheid is ons probleem!

Rian gebruik die storie van Abraham om te verduidelik dat God 'n goeie plan vir elkeen van ons het. Die vraag is net of ons ten volle in geloof sal oorgee aan Hom al lyk die toekoms duister.

Ons sluit vandag ons pinkster week af met Handelinge 1. Rian verduidelik vir ons dat ons so geneig is om te dink dat die Gees by ons behoeftes en drome moet aanpas, terwyl ons eintlik onsself moet aanpas om in te val by wat Hy reeds mee besig is.

Rian se eerste preek by ons as offisiële herder van SA Gemeente Londen. Ons begin ook vandag ons pinksterweek met die titel "In die voetspore van Jesus".

As ons na Jesus se lewe op Aarde kyk en al die wonderwerke wat Hy gedoen het, vra ons onsself die vraag af - waar is Hy nou? As ons nie meer sulke wonderwerke om ons sien gebeur nie, is Jesus steeds met ons, of kort daar iets?

Dawie en Alma deel verder met ons die tips en tricks wat hulle deur die jare in hul huwelik geleer het.

Dawie en Alma praat vandag en volgende week bietjie uit die huis uit oor wat hulle deur die jare geleer het oor die moets en moenies tov kinders grootmaak.

Na afloop van die vulkaniese uitbarsting in Ysland wat miljoene mense se lewens tot stilstand gebring het, verduidelik Rian vir ons aan die hand van Joh 20 dat die Here soms juis 'n mense se lewe tot stilstand roep sodat jy 'n hele nuwe rigting vir jou lewe kan inslaan.

Rodney Woods lewer 'n paasfees boodskap oor hoe ons seker kan wees van die fisiese opstanding van Jesus.